О нас пишут

Ёмла тяштеня

Тундань фкя мани шиня музыкальнай школа-интернату сятявняста сувась тядянц мархта ёмла цёраня. Тя ульсь Андрей Гирич. Сон абондозне ванондсь кафта пяльге, сияк кемоста кирдезе тядянц кяденц. Синь састь тяза Ельниковскяй райононь Оцю Мокшень Пашад велеста. Мзярда-бди Андреень тядяц сонцьке тонафнесь тя школаса, налхксь фортепианаса, сяс и вятезе тяза эсь цёранц.
Каршезост пеедезь лиссь директорсь. «Ётада, ётада! – мярьгсь сон. Минь школасонк тонафни лама стирняда-цёраняда, конат кельгсазь музыкать. Синь туйхть мялезот, – поладозе сон. – Аде няфтьса, коса шабатне эряйхть, тонафнихть, ваймосихть». Андрей валомне якась класста-класс и ванондсь инструменттнень лангс. Фкя класса преподавательсь морась балалайкаса. Андрей кенярдезь пшкядсь: «А мон содаса тя инструментть – тя балалайка! Монь атязе пяк лац морась балалайкаса. Вай, кодама цебярь инструментсь! Моньге мялезе тонафнемс балалайкаса морама».
Эста цёрашабась нинге ашезе сода, што ётай аф лама пинге и сон аф аньцек тонады балалайкаса морама, но и кармай якама концертова, конкурсова и аф весть арай лауреатокс.
Васенце казнеть Андрей получазе 2018 кизоня. Казань ошса «Кудесница балалайка» VI-це Всероссийскяй конкурсса сон занязе III-це вастть. 2019 кизоня Л.И. Воиновонь лемса народнай интрументонь ансамблянь и балалайкаса мораень IV-це Всероссийскяй конкусса занязе II-це вастть. Тяка кизоня арась I-це степенень лауреатокс «Фольклорная мозаика» конкурсса, кона ётась М.Е Евсевьевонь лемса МГПИ-са. Тя пялькстоматненди сонь аноклазе кельгома преподавателец Наталья Николаевна Кулагина.
Надиятама, што тя цёранясь мусы эряфса вастонц. Катк касы ёнюняста, шумбраняста и эздонза лиси содаф музыкант.