О нас пишут

«ШКОЛАНЬ ПРЯДЫЦЯТНЕ – КАШТАНЧИНЕК»

Республикань эйкакшонь музыкальной школасо-интернатсо ютась лембе вастовома. Сон лемдевсь: «Школань прядыцятне – минек каштанчинек». Те тонавтнема таркась панжовсь 1959 иестэ. А лововияк, зяро эйкакшт тесэ тонавтнесть, зяро паро, виев ды ёроков музыкантт тестэ лиссть.

Сынь сравтовсть масторонок келес ды эрить республикасонок. Саемга, содавикс композиторось, Мордовиянь Гимнань авторось Н. В. Кошелева, музыкань коряс педагогтне А. Е. Пивкин, В.П. Толкачева, А. Н. Гурьянов ды лиятне. Тонавтнесть семиянек: лелят-сазорт, патят-ялакст, мейле эйкакшост ды нуцькасткак. Арсетяно, эрьвась эйстэст кирди мельсэнзэ музыкальной школанть, тонавтыцятнень, а стувтни се лембенть, конань макссть тензэ.

Те вастовоманть пурнызе В. М. Прокаева тонавтыцясь. Эйкакштненень инжекс сакшность Татьяна Канаева, Ксения Горина ды Василий Родионов. Сынь мельспаросо ёвтнесть эсь прядост, ледстнесть тонавтнемань шкаст, седе, кода ладявсь эрямост. Тонавтницятне парсте кунсолость, мейле макснесть тенст ламо кевкстемат.

Татьяна Канаева тонавтнесь музыкальной школасо-интернатсо баянонь классо. Мейле прядызе Л. П. Кирюков лемсэ музыкальной училищанть, Нижний Новгородсо консерваториянть. Сон аволь весть изнякшнось музыкальной конкурстнэсэ. Тонавтнесь ансяк «ветес». Тетязо-авазо ламо лездасть тейтерест туртов, несть, музыкась саи эрямосонзо покш тарка, ды натой рамасть тензэ баян. Сестэ питнезэ ульнесь 360 тёжат целковойть (ней миллиононть малава)! Татьяна велявтсь Мордовияв. Важоди музыкальной школасо-интернатсо, музыкальной училищасо ды Левжа велень морамонь ансамблясо. Сон пек виев баянист, сёрмады музыка. Те вастовомасонть весень содавтынзе «Вечное успокоение» произведениянть марто.

Ксения Горинань кото иесэ музыкальной школав-интернатов ветизь тетязо-авазо. Эзть кевкстнеяк, кодамо классос бажи. Тейтернесь кармась тонавтнеме скрипкань классо. Скрипкась ловови аволь шожда инструментэкс, ламо сави тонавтнемс, путомс вийть ды ойме. Ксениянь авазо – Елена Воронина, Мордовиянь заслуженной артисткась, сон морси «Келу» фольклорной ансамблясо. Сынст весе семиясь музыкань вечкиця, морсицят ды седицят. Ксения Александровнань валонзо коряс, сестэ сынь тесэ эрясть свал, кудов оймсема читнестэяк эзть нолдтне. Ламо тонавтнесть. Ды те тенст эзь маряво тамашань тевекс. Школадо мейле сонзэ прядыцятне кувать ледстнесть, кода тесэ тантейстэ ды ламо андсть. Ксения Горина музыкальной школанть прядомадо мейле истя жо тонавтнесь Саранскоень музыкальной училищасо, седе тов – Московонь государственной культурань институтсо. Ней сон тонавты эсензэ школасо-интернатсо, важоди государственной Камерной оркестрасо.

Василий Родионов – МР-нь искусствань заслуженной деятель, ламот республикасонок содасызь. Чачсь Рузаевкань райононь Палаевка велесэ, тей тонавтнеме сась 1981 иестэ. Васенце тонавтыцязоль А. Н. Гурьянов, кона сестэ ансяк-ансяк ушодсь важодеме тонавтыцякс.

– Александр Николаевичень лангс ванозь, кода сон седи баянсо – минек седеяк весень кирвазтимизь. Оймсема читнестэяк сакшныль важодеме. Классонок покшоль, весе арсесть улемс баянистэкс. Монь марто тонавтницятнень эйстэ ламотне теевсть культурань заслуженной роботникекс, саемга, Иван Сургаев, Нина Шумкина ды лият. А зяро тесэ ульнесть концертт! Те шкас мельсэнь ашти баянистэнь дуэтэсь, – ледстни Василий Родионов.

Эряви меремс, вишка шкасто сон понгонесь «Артекевгак». В. С. Родионов прядызе Л. П. Кирюков лемсэ музыкальной училищанть. Седе тов – Казанень Искусствань ды культурань музыкальной институтонть. Покш бажамозо ульнесь велявтомс тонавтомо музыкальной школав. Мелезэ топавтовсь. Важодемань кизэ ушодовсь тесэ. Вастызь пек лембестэ. Кемень иеть сон тонавтсь эйкакштнень. Мейле тердизь Мордовиянь государственной филармонияв, косо сон ульнесь «Келу» фольклорной ансамблянь художественной руководителекс. Седе тов роботась музыкальной эрьва кодамо коллективсэ. Василий Сергеевич сёрмадсь аволь аламо эстрадной морот, ды нейгак сёрмады, тейни моротненень неень шкань обработкат. Сон ёвтась ламо сюкпрянь валт тонавтыцянзо туртов.

Эйкакштне мельга-мельцек кепсесть кедест, мельспаросо кевкстнесть инжетнень. Инжетне анокстасть музыкальной номерт. «Школань прядыцятне – каштанчинек» – ды те алкукс истя, тесэ а стувтнить тонавтницяст, кирдить мартост сюлмот, кецнить изнявксост кисэ.

Татьяна Маторкина