О нас пишут

Велявтсть изнявкс марто!

Ноябрянь 24-25-це читнестэ Казань ошсо ютась «Кудесница-балалайка» балалайкасо ды народной инструментсэ седиця ансамблятнень Весероссиянь VI-це пелькстамо. Мордовиянть пельде тов якасть республикань эйкакшонь музыкальной школань-интернатонь тонавтницятне. Велявтсть тосто эйкакштне изнявкс марто. Самай тень коряс минь вастовинек педагогонть В.М.Прокаевань марто, кона ёвтнесь конкурстонть.

– «Кудесница-балалайка» пелькстамонтень сакшность малав 100 ломанть, теде башка, пряст невтизь малав 40 ансамблят. Эйкакштне ульнесть Россиянь эрьва кодамо ёнкссто, натой Дальней Востоксто. Саранскойстэ якасть тонавтницян Светлана Благова ды Виктория Бызгаева. Сынь седить домрасо. «Ансамбль» номинациясонть тейтернетне лиссть II-це степенень лауреатокс. Истя жо якась 2-це классонь тонавтницясь Андрей Гирич, сон лиссь III-це степенень лауреатокс (тонавтыцязо – Н.Н.Кулагина), – ёвтни Валентина Михайловна.

Неть кавто тейтернетне састь Кочкурбуень Морд. Давыдова велестэ. Ней сынь тонавтнить музыкальной школань-интернатонь 4-це классо. Домрасо седить кода вейсэ, истя жо вейкень-вейкень. Казанев ардомась ды истямо покш пелькстамосо прянь невтемась сынст туртов васенцедель. Нама, эйкакштне пек талность. Ансяк вакссост ульнесь тонавтыцяст В.М.Прокаева, кона оймавтсь, тонавтсь, кода ветямс прянть, кармавтсь а пелемс ды ютамс икелев. Тейтернетне седизь Н.В.Кошелевань «Вирь» ды Е.Дербенконь «Полька» произведениятнень.
Казанесь пек тусь мелезэст. Конкурстонть мейле сынь якасть ошканть, ваннызь мазый таркатнень. Кода ёвтни В.М.Прокаева, тосо ковгак а кадоват, ломантне мелень ваныцят, инжень вечкицят, кевкстят мезеяк – сынь сеске ёвтыть-лездыть, натой молить ильтямот ков эряви.
Саранскоев самсто сынст вастызь кода алкуксонь изницятнень. Вагонсто лисезь неизь тетяст-аваст ды малавиксэст, конат састь цеця марто, весе мельспаросо цяпасть эйкакштненень. Ризксэнтень, истямо пелькстамов ардоманть кияк а панды. Сюкпря тетятненень-аватненень, конат муить ярмакт оршамопелень рамамс, пандомс кинть ды тосо эрямонть.

Эряви меремс, Казанде икеле, ноябрянь 22-23-це читнестэ эсенек республикасо ютась «Валдо кине» Мордовиянь композитортнэнь музыкаст коряс эйкакшонь фестиваль. Света ды Вика сайсть изнямонь таркат.

Валентина Михайловна Прокаева 39 иеть важоди республикань эйкакшонь музыкальной школасо-интернатсо. Тонавты вишкинетнень седямо домрасо. Сон – МР-нь Культурань заслуженной роботник, лиссь изницякс «Эйкакшонь искусствань школань сехте паро тонавтыця» пелькстамосо, казезь «Сехте паро тонавтыця» номинациясо МР-нь Прявтонь премиясо. Педагогось ускси эйкакштнень пелькстамо лия ошов: Пензав, Саратовав, Московов, Санкт-Петербургов. Паряк, седеяк сеедьстэ усксевель, бути явовольть тенень ярмакт, бути аламошка лездавольть. Сонзэ тонавтницянзо прядсть музыкальной училищат, консерваторият ды нейгак тонавтнить. Сралесть Россиянь келес. Ялатеке а стувтнить тонавтыцяст. Сакшныть-совсить варштамонзо, сёрмадыть лембе валт Интернет вельде.

Республикань эйкакшонь музыкальной школась-интернатось панжовсь 1958 иестэ. Тедеде сонензэ топодсть 60 иеть. Течи тесэ тонавтнить ды эрить малав 100 эйкакшт кода Саранскойстэ, истя жо районтнэстэ ды лия регионсто Ветясызь сынст кото иестэ саезь.

– Минек школасо зярыя отделеният – народной инструментэнь, оркестрань, фортепианонь. Эйкакштне тонавтнить седямо эрьва кодамо седямопельсэ: баянсо, аккордеонсо, балалайкасо, домрасо, скрипкасо, виолончельсэ, саксофонсо, кларнетсэ, флейтасо, фортепианосо ды лиясо. Ули хоронок, народной инструментэнь оркестранок, камерной ансамблянок ды «Лаймоня» фольклорной ансамблянок (сонзэ ловтано «визитной карточкакс). Эйкакштне сеедьстэ невтить пряст республикань покш пелькстамотнесэ, седить-морсить кенярксчитнесэ, ардтнить лия ёнксовгак. Школанть-интернатонть прядомадо мейле тонавтнить Л.П.Кирюков лемсэ музыкальной училищасо.

Тейтернетне ды цёрынетне якить тонавтнеме ошонь 16№ ды 18№ школатнес. Уроксто мейле чокшнес ютыть занятияст минек музыкальной школасонть. Тесэ сынь эритькак. Оймсема читнестэ ардыть кудов. Бути эряви анокстамс конкурсов, нама, аштить теске. Тесэ мартост важодить паро ды виев педагогт. Ламот эйстэст сынсь прядызь те школанть, – ёвтни музыкальной школань-интернатонь прявтось Ирина Юрьевна Юртанова. Сон ды весе коллективесь аштить мельспаросо тонавтницятнень кис, конат изнясть «Кудесница-балалайка» Весероссиянь пелькстамосонть.